Ég brenn fyrir heilbrigði á líkama og sál og nýt þess að leiða aðra inn í kraftinn sinn. Ég sjálf áttaði mig á því einn daginn, fyrir ekki svo löngu síðan, að ég var ekki að bera ábyrgð á minni eigin hamingju. Ég sá að á meðan ég var ekki að gera neinar breytingar væri ég að velja óbreytt ástand því það að taka ekki ákvörðun um breytingu er ákvörðun út af fyrir sig. Ég tók ákvörðun um að yfirstíga ótta minn og hræðslu og trúa á sjálfa mig. Eftir 10 ár í sambandi tók ég U-beygju í lífinu og varð sjálfstæð móðir tveggja leikskólabarna og fann að mér var ætlað að vinna með fólki en ekki tölum á skjá

​

Ógreint ADHD hafði kennt mér gríðarlega seiglu í gegnum árin þar sem ég fann alltaf mínar leiðir til að láta allt ganga upp. Ýmis færni leynist í því að læra að leysa alls konar verkefni. Þó kom að því að líkaminn sagði stopp enda er ekki endalaust hægt að keyra á þrautseigju. Þá þurfti ég að kljást við stærsta verkefni mitt hingað til, kulnun.

​

Ég er kona sem ákvað að dýpka tengsl mín við mig sjálfa til að skapa betri færni til að bera ábyrgð á mér og minni líðan. Á því ferðalagi sá ég betur hvar mín ábyrgð lá og lærði að mæta mér. Innri vinnan fór að skína út og ytri ásýnd blómstraði með.

​

Ég hef ítrekað verið spurð hvað ég hafi gert því útlitslegu breytingarnar eru svo miklar. 19 kg af líkama breyta miklu en 100 kg af sál breyta enn meiru. 

​

Það fylgir því gífurleg streita og oft vanlíðan að reyna að vera eitthvað sem þú ert ekki. Það er þess virði að komast að því hver þú ert og tengjast þér og njóta þess að vera akkúrat þú. Það er svo mikið frelsi í því að kunna vel við sjálfan sig og að skapa góða tengingu við líkama og sál!